allah ai buto hamein dikhlae lucknow

allah ai buto hamein dikhlae lucknow
sote mein bhi ye kahte hain hum hae lucknow
aisa hua hun hijr mein us ke nahif-o-zar
dekhe agar mujhe wahin sharmae lucknow


aae na mere pas to main aap hi chalun
mujh ko khuda kare kahin bulwae lucknow
kalkatta ke hasinon ko jab dekh leta hun
us waqt dil mein hota hai sauda-e-lucknow


ab lut gaya hai kya raha dozakh se badh ke hai
rashk-e-bahisht kahte the sab ja-e-lucknow
khush-chashmi aahuon ki wo bhule jahan mein
dekhe jo aankh nargis-e-shahla-e-lucknow


gulshan ajab bahaar ke har qasr rashk-e-khuld
aur gomti ghazab ki hai dariya-e-lucknow
hur-o-pari ko rashk tha ek ek shakhs par
be-misl the sabhi mah-e-sima-e-lucknow


marne ke baad bhi na mitega jigar se dagh
jannat mein hum ko hoegi parwa-e-lucknow
jab se hata hai wo tah-o-baala ye ho gaya
jannat koi zarur tha baala-e-lucknow


main kya kahun faqiron ko jo kuchh ghurur tha
ek ek gada-e-shahr tha dara-e-lucknow
hatta nahin tasawwur-e-asbab-o-mulk-o-mal
kanon mein baj rahi hai wo shahna-e-lucknow


kya kya hasin the jama paristan ka takhta tha
nazron mein phirte hain rukh-e-zeba-e-lucknow
shahon pe fakhr karte the is mulk ke gada
tha misl-e-jam-e-jam mai-o-mina-e-lucknow


har-chand lakh tarah bhulata hun yaad ko
'akhtar' pukar uthta hai dil hae lucknow