amal se pyar se mohkam yaqin se niklega

'amal se pyar se mohkam yaqin se niklega
ye ped wo hai jo banjar zamin se niklega
jahan pahunch ke sabhi thak ke baith jate hain
mujhe yaqin hai mera dar wahin se niklega


tu mere sajdon ko diwangi ka nam na de
ye naqsh wo hai jo meri jabin se niklega
mere junun ki shiddat ko aap kya jaanen
ki aasman bhi mera zamin se niklega


yahan kisi ke chalan par na bad-guman hona
kahin se koi to koi kahin se niklega
hai kaun us ka mumasil wo shakhs jaisa hai
majal kis ki jo us ke qarin se niklega


yunhi ghazal ko pilaunga khun-e-dil 'daem'
na 'aib phir nigah-e-nukta-chin se niklega