apne bare mein wo gar puchh len phir kya kahiye

apne bare mein wo gar puchh len phir kya kahiye
barmala jaan-e-jigar jaan-e-tamanna kahiye
us ki jadu-bhari aankhen hain ki do paimane
hasil-e-zist use husn-e-sarapa kahiye


lakh main nichi nigahen rakhun kya hota hai
wo agar khud ko numayan karen phir kya kahiye
jis ke dekhe se mere dil ko sukun milta hai
aise insan ko ghane ped ka saya kahiye


wo ki har baat pe kahte hain mujhe tu kya hai
aise andaz-e-takallum ko bhala kya kahiye
'asr-e-hazir mein to sach kahne se dar lagta hai
farsh ko 'arsh ya qatil ko masiha kahiye


jis ki guftar ya lahje mein kashish hai 'daem'
us ki har ek ada aankh ka dhoka kahiye