apne bojh se TuT raha hun

apne bojh se tut raha hun
main bhi kanch ka ek tukda hun
koi kahani yaad nahin hai
raddi kaghaz bech chuka hun


zist ne apne par phailae
ret ke sahraon mein khada hun
apni baat kahun to kyunkar
un ki baaton mein uljha hun


sab mitti ke saudagar hain
jin ke bhi hathon mein bika hun
mujh se tark-e-talluq kar lo
main andar se tut chuka hun


tum hi becho tum hi kharido
sud-o-ziyan se la-parwa hun
lakh sanwaro lakh bigado
waisa rahunga main jaisa hun


nuqta ek hun 'iraj' lekin
samton hi samton mein bata hun