apne hi dil mein nahin har dil mein ghar maine kiya

apne hi dil mein nahin har dil mein ghar main ne kiya
is tarah se zindagi ka tai safar main ne kiya
khun-e-dil se 'umr-bhar main ne sajae baam-o-dar
zindagi ka lamha-lamha ba-hunar main ne kiya


us ne bakhshi 'ishq ke sahra ki mujh ko sahibi
aur har zarre se us ko jalwa-gar main ne kiya
mah-o-anjum fikr ki qimat chuka sakte nahin
apne ek ek harf ko rashk-e-guhar main ne kiya


ek ek tahni se milti thin hazaron ne'maten
phir bhi un pedon ko be-barg-o-samar main ne kiya
'mast' sha'ir hun magar waqif hun apne farz se
be-khabar rah kar bhi sab ko ba-khabar main ne kiya