اپنے تیور سے جو کر دیتا ہے سب کو لا کلام

اپنے تیور سے جو کر دیتا ہے سب کو لا کلام
اس کی خدمت میں کروں گا پیش آج اپنا کلام
شہر میں کوئی مجھے پہچان ہی پاتا نہیں
اور صحرا میں کسی سے میں نہیں کرتا کلام


میری خاموشی کی محفل میں کوئی تو داد دے
ہے کوئی میرے سوا جو کہہ سکے ایسا کلام
ہم برے لوگوں کی صحبت نے کیا اس کو خراب
وہ بھی تنہائی میں دہراتا رہا اپنا کلام


مختلف انداز کی شادی ہے یہ باراتیو
پھول سی زندہ زمیں اور زہر سا سچا کلام
سارے جذبوں کے دکاںداروں کی جیبیں بھر گئیں
بک گیا بازار میں جتنا بھی تھا سستا کلام