اپنی آنکھیں ترے چہرے پہ لگا کر دیکھوں

اپنی آنکھیں ترے چہرے پہ لگا کر دیکھوں
اور پھر اپنا بکھرتا ہوا منظر دیکھوں
نیند آئے تو کوئی گوشۂ تنہائی بہت
پاؤں پھیلانے کی حسرت ہو تو چادر دیکھوں


کتنی راتیں اسی خواہش میں بتائیں میں نے
چاند نکلے تو ذرا گھر سے نکل کر دیکھوں
پیش جب کر ہی چکا حرف عقیدت اس کو
کیوں نہ اس ہاتھ پہ ایمان بھی لا کر دیکھوں


عکس شاید ہے سلامت پس آئینۂ جاں
اپنی جانب کئی بڑھتے ہوئے لشکر دیکھوں
کون اس تشنگیٔ روح و بدن کو سمجھے
بیچ صحرا میں کھڑے ہو کے سمندر دیکھوں


موسم سنگ زنی کی ہے خبر گرم جمالؔ
دست و بازو کبھی دیکھوں تو کبھی سر دیکھوں