apni chahat ko mere dukh ke barabar kar de

apni chahat ko mere dukh ke barabar kar de
ya mujhe dekh le is tarh ki patthar kar de
ye simatti hui duniya ye bikharte hue log
intiha koi to har shai ki muqarrar kar de


kis ko dekhun ki tere nam ka nashsha utre
kis ko chahun jo tere sehr ko kamtar kar de
mausam-e-wajd mein ja kar main kahan raqs karun
apni duniya meri wahshat ke barabar kar de


ek khatka mujhe rahta hai mohabbat mein sada
us ka kya jab jise chahe mera ham-sar kar de