apnon ke sath jab koi hota hai hadisa

apnon ke sath jab koi hota hai hadisa
sine mein nok-e-tir chubhota hai hadisa
taza lahu se karta hai poshak pahle tar
aanchal phir aansuon se bhigota hai hadisa


us ki bas ek hunar mein mahaarat hai be-misal
dukh ki ladi mein ashk pirota hai hadisa
be-ehtiyati karti hai khub us ki parwarish
ghaflat ki narm god mein sota hai hadisa


bar-e-gham-e-ajal se hon jab log na-tawan
lashon ka bojh aap hi dhota hai hadisa
koi 'qamar-malal' nai baat to nahin
khuni sadak pe roz hi hota hai hadisa