arz kuchh karna tha fursat ho agar

By ajmal-siddiquiJune 25, 2021
arz kuchh karna tha fursat ho agar
bol dun tum se mohabbat ho agar
qadmon par tere dobara hun fida
jism mein thodi bhi harkat ho agar


wasl-o-furqat ki hadon se tu nikal
bas mohabbat ho mohabbat ho agar
kuchh na ho dil mein na yaaden hon na aas
aise rukhsat ho tu rukhsat ho agar


yaad aata bhi nahin ab main tumhein
yaad aa jaun ijazat ho agar
31207 viewsghazalEnglish