aur taDpae mujhe dard-e-jigar aaj ki raat

aur tadpae mujhe dard-e-jigar aaj ki raat
kal wo aaenge nahin aae agar aaj ki raat
khud-bakhud kam hai mera dard-e-jigar aaj ki raat
kaun aaega ilahi mere ghar aaj ki raat


ulte deta hai naqab-e-rukh-e-raushan koi
sham hi se hui jati hai sahar aaj ki raat
main jo betab gaya bazm mein to wo bole
khair hai khair hai aa nikle kidhar aaj ki raat


dar-e-mai-khana agar band hai masjid ko chalo
mai-kasho pad raho allah ke ghar aaj ki raat
han zara chaunk to aind aind ke sone wale
le kisi aashiq-e-muztar ki khabar aaj ki raat


ek muddat se jise dhund rahi thin aankhen
aane wala hai wahi rashk-e-qamar aaj ki raat
subh hote tere bimar ka dam niklega
hai ye mehman sifat-e-sham-e-sahar aaj ki raat


dard-e-dil tu ne hamein mar hi dala hota
wo kaleje se lagate na agar aaj ki raat
koi sota hai kahin sath kisi ke shayad
dil ke hamrah tadapta hai jigar aaj ki raat


tum to mar jaoge dam bhar mein tadap ke 'naushad'
dur-az-haal wo aae na agar aaj ki raat