بات رکھنے کا موقع دیا جائے گا

بات رکھنے کا موقع دیا جائے گا
بھیڑ اٹھ جائے گی تب کہا جائے گا
نوجوانوں سے رشتہ بناؤں گا پھر
رات بھر گھر سے باہر رہا جائے گا


پھر سے بیٹھوں گا تسنیم کی ٹال پر
پھر پڑوسی سے جھگڑا کیا جائے گا
وہ جو اک یار ہے اپنے بچپن کا یار
اس کے گھر بھی کسی دن رکا جائے گا


ایک دم کٹ گیا ہوں محلے سے میں
پھر سے شادی ولیمہ کیا جائے گا
اتنی جلدی بھی کیا ہے شفا کی تمہیں
وقت آنے پہ اچھا کیا جائے گا


ساری نظریں کنارے پہ رہ جائیں گی
ایک سر جھیل میں ڈوبتا جائے گا