بدن بناتے ہیں تھوڑی سی جاں بناتے ہیں

بدن بناتے ہیں تھوڑی سی جاں بناتے ہیں
ہم اس کے عشق میں کار جہاں بناتے ہیں
بگاڑ دیتا ہے کوئی ہمیں کناروں سے
کبھی جو خود کو ترے درمیاں بناتے ہیں


عجیب رقص میں رہتا ہے وہ بگولہ صفت
تو ہم بھی اس کے لئے آندھیاں بناتے ہیں
وہ ہاتھ دیتے ہیں ترتیب میرے اجزا کو
پھر اس کے بعد مجھے رائیگاں بناتے ہیں


سیاہ پڑتا گیا ہے وہ لمحۂ دیدار
مرے چراغ بھی کتنا دھواں بناتے ہیں