بدن باندھے ہوئے سانسوں کی رہداری میں رہتے ہیں

بدن باندھے ہوئے سانسوں کی رہداری میں رہتے ہیں
کہ ہم ہر دم کہیں جانے کی تیاری میں رہتے ہیں
نہ ہوں آنسو تو یہ آنکھیں بھلی لگتی نہیں ہم کو
سو اکثر آپ اپنی ہی دل آزاری میں رہتے ہیں


ہمیں معلوم ہے رونق یہ بازاروں کی جھوٹی ہے
مگر پھر بھی فریب حسن بازاری میں رہتے ہیں
ہم اہل عشق پھر اہل ہوس سے مات کھا بیٹھے
وظیفہ خوار بزم حسن درباری میں رہتے ہیں


ہمارے دل تو ہیں مصروف سرکاریں گرانے میں
بدن تعمیل احکامات سرکاری میں رہتے ہیں
دبے ہیں خاک میں کتنے ہی سورج چاند اور تارے
سو ہم اپنی زمیں کی آسماں کاری میں رہتے ہیں


ہماری شاعری اک مستقل ہولی کا موسم ہے
ہزاروں رنگ اس لفظوں کی پچکاری میں رہتے ہیں
جناب فرحت احساسؔ اب نہ شہری ہیں نہ صحرائی
مسلسل درمیان خواب و بے داری میں رہتے ہیں