badan charagh nahin hain mohabbaten apni

badan charagh nahin hain mohabbaten apni
magar ye lau ko badhati zaruraten apni
tamam haq ke taraf-dar chaaron khane chit
koi sanbhaal na paya sadaqaten apni


badal na len kahin rasta ye aag ki lapten
hamein hi rakh na kar den ye nafraten apni
ab us se ru-baru hone mein kuchh nahin rakkha
bala ke naqsh banati hain wahshaten apni


samet apne sitaron ko aasman wale
bujha ke chhod gain jin ko hasraten apni
kidhar se aati hai jaane ye khwab-nak sada
to kam na hongi kabhi kya masafaten apni