بدن کمان نظر تیر کرنے والا ہے

بدن کمان نظر تیر کرنے والا ہے
وہ میرے خواب کو تعبیر کرنے والا ہے
سنا ہے زعم ہے اس کو کمال حسن سے وہ
تصورات کو زنجیر کرنے والا ہے


وہ ایک شخص میں جس سے کبھی ملا ہی نہیں
مری جہان میں تشہیر کرنے والا ہے
سحر کا پھر سے گماں ہے ملا کے مجھ سے نظر
مجھے پھر آج وہ تسخیر کرنے والا ہے


مناؤ جشن کرو جا کے دشمنوں کو خبر
وہ مجھ کو حاصل تقدیر کرنے والا ہے
جدا نہ ہوں گے جو اس بار ہم بہم ہوں گے
نئی کچھ ایسی وہ تدبیر کرنے والا ہے