باہر کی کیا یاد آئے گھر یاد نہیں آتا

باہر کی کیا یاد آئے گھر یاد نہیں آتا
اب تو اپنا جسم بھی اکثر یاد نہیں آتا
زخموں کی ساری تحریریں یکساں لگتی ہیں
کس نے مارا پہلا پتھر یاد نہیں آتا


کہاں اٹھایا کہاں جھکایا کہاں کٹایا تھا
اتنے کرداروں والا سر یاد نہیں آتا
روح کہاں کی جب جسم و جاں پر بن آئی ہو
کوئی قلندر کوئی پیمبر یاد نہیں آتا


کرتے کرتے رقص ٹھہر جاتا ہوں گھبرا کر
جب بھی اپنے رقص کا محور یاد نہیں آتا
اپنی شان نزول سمجھ میں آنے لگتی ہے
جب کوئی اپنے سے برتر یاد نہیں آتا


قطرے نے آپ اپنی شخصیت حاصل کر لی
باغی کو اب ملک سمندر یاد نہیں آتا
تجھ کو تو سب یاد ہے جان من فرحت احساسؔ
تو ہی کیوں پھر آگے بڑھ کر یاد نہیں آتا