bahte dariyaon mein pani ki kami dekhna hai
umr bhar mujh ko yahi tishna-labi dekhna hai

ranj dil ko hai ki ji bhar ke nahin dekha tujhe
khauf is ka tha jo aainda kabhi dekhna hai

shab ki tariki dar-e-khwab hamesha ko band
chand din baad to duniya mein yahi dekhna hai

khun ke qatron ne tufan utha rakkha hai
ab rag-o-pai mein mujhe barf jami dekhna hai

kis tarah rengne lagte hain ye chalte hue log
yaro kal dekhoge ya aaj abhi dekhna hai