بہت دنوں سے یہیں ہو عجیب آدمی ہو

بہت دنوں سے یہیں ہو عجیب آدمی ہو
اسی زمیں کے مکیں ہو عجیب آدمی ہو
ابھی تلک یہی الجھن کہ اس خرابے میں
نجانے ہو کہ نہیں ہو عجیب آدمی ہو


کبھی ملو تو بتانا ذرا تسلی سے
گمان ہو کہ یقیں ہو عجیب آدمی ہو
ہے اک جہان عدم اور اس وجود کے ساتھ
اسی جہاں میں کہیں ہو عجیب آدمی ہو


اٹھی صدائے انا الحق ورید جاں کے قریب
سنا ہے تم بھی وہیں ہو عجیب آدمی ہو
سب اپنے آپ میں محصور ہو گئے ہیں یہاں
تم اپنے گھر میں نہیں ہو عجیب آدمی ہو