bahut jumud hai tari koi KHayal zara

bahut jumud hai tari koi khayal zara
naya sa lafz meri khak par uchhaal zara
wo tu hi hai ki main bikhra hun samne jis ke
tu kam-nasib nahin hai mujhe sambhaal zara


bichhadte waqt ye khwahish kahan thi na-jaez
use bhi hota hamari tarah malal zara
nahin jo manta khud ko ki be-misal hai tu
tu apne jaisi dikha de koi misal zara


hansi mein tal de phir se hamari har khwahish
phir ek bar thapak de hamara gal zara
main khud ko rakh na kar dun ye dar satata hai
hisar-e-jism se bahar mujhe nikal zara