bahut nidhaal bahut bad-hawas lagti hai
ye bhid shahr ki kitni udas lagti hai

talash-e-ab main maqsad na faut ho jae
safar ho sakht to ruk ruk ke pyas lagti hai

wo jis se hum ne hamesha hi duriyan rakkhin
ab us ki baat mein mujh ko mithas lagti hai

tumhaare ganw ke pipal ke is chabutare se
hawa ki aankh bahut ru-shanas lagti hai

zamana ho gaya us se mila nahin hun main
wo ab bhi mujh ko magar aas-pas lagti hai