بنتے ہیں روز روز فسانے نئے نئے

بنتے ہیں روز روز فسانے نئے نئے
ہوتے ہیں لوگ روز دوانے نئے نئے
آئیں گے اس کے بعد زمانے نئے نئے
بربادیوں کے ہوں گے نشانے نئے نئے


تنہائیوں میں کھود کے دل اور دماغ کو
نغموں کے پائے ہم نے خزانے نئے نئے
محفل وہی ہے شمع بھی پروانے بھی وہی
آتے ہیں لوگ رنگ جمانے نئے نئے


واقف نہیں ہیں عشق کے رسم و رواج سے
ہم تو ہوئے ہیں تیرے دوانے نئے نئے
غم سے ہی دل میں آئے گی جذبات پر بہار
نکلیں گے پھول بن کے ترانے نئے نئے


ہر مہ جبیں کے ناز و ادا ہیں الگ الگ
ملتے ہیں عاشقی کے بہانے نئے نئے
مے خانہ بند ہو گیا ساقیؔ تو کیا ہوا
کر لیں گے میگسار ٹھکانے نئے نئے