barsi hain wo aankhen ki na baadal kabhi barse
andaza-e-gham kya ho magar dida-e-tar se

wo chaaragari thi ki azizon ki duaen
laut aai hain matam ke liye bab-e-asar se

ek jabr-e-musalsal hai anasir ki kahani
mukhtar kahe jate the jab nikle the ghar se

shayad koi manzil nahin is rah mein padti
wapas nahin aata koi yaadon ke safar se

kis ishrat-e-rafta ki ye wahshat-e-asari hai
dil dub gaya qurb-e-shab-e-wasl ke dar se