bas gai dil mein kis ki ranai

bas gai dil mein kis ki ra'nai
aaj tak mil saki na tanhai
barha tere na-muradon ko
maut aawaz de ke pachhtai


aisi raaten bhi hum pe guzri hain
tere pahlu mein teri yaad aai
jis jagah ja ke phir qadam na uthen
wahin le chal hawa-e-sahrai


dosto mujh ko sangsar karo
ab bhi us but ka hun main saudai
mujh se sarkash ka sar jahan jhuk jae
us ko zeba hai naz-e-yaktai


wahi duniya mein ek hasin nahin
phir bhi mat puchh us ki zebai
dil mita bhi to sadgi pe mita
hae ranginiyon ke shaidai