بس گئی دل میں کس کی رعنائی

بس گئی دل میں کس کی رعنائی
آج تک مل سکی نہ تنہائی
بارہا تیرے نا مرادوں کو
موت آواز دے کے پچھتائی


ایسی راتیں بھی ہم پہ گزری ہیں
تیرے پہلو میں تیری یاد آئی
جس جگہ جا کے پھر قدم نہ اٹھیں
وہیں لے چل ہوائے صحرائی


دوستو مجھ کو سنگسار کرو
اب بھی اس بت کا ہوں میں سودائی
مجھ سے سرکش کا سر جہاں جھک جائے
اس کو زیبا ہے ناز یکتائی


وہی دنیا میں اک حسین نہیں
پھر بھی مت پوچھ اس کی زیبائی
دل مٹا بھی تو سادگی پہ مٹا
ہائے رنگینیوں کے شیدائی