bataun kya kisi se dil mein kya kya tut jata hai
ki jab muflis ke bachche ka khilauna tut jata hai

ye meri bad-nasibi hai bataun kis tarah tum ko
wo jab sapne mein aate hain to sapna tut jata hai

bahut hi muztarib rahta hai wo har pal zamane mein
ki jis insan ka ulfat se bharosa tut jata hai

lagae lakh chehre par koi chehra magar sun le
bahut din tak nahin rahta mukhauta tut jata hai

zamin aawaz deti hai mohabbat se mujhe 'aqib'
to mera chand chhune ka irada tut jata hai