be-niyaz-e-gham-e-paiman-e-wafa ho jaana

be-niyaz-e-gham-e-paiman-e-wafa ho jaana
tum bhi auron ki tarah mujh se juda ho jaana
main bhi palkon pe saja lunga lahu ki bunden
tum bhi pa-basta-e-zanjir-e-hina ho jaana


garche ab qurb ka imkan hai bahut kam phir bhi
kahin mil jaen to taswir-numa ho jaana
sirf manzil ki talab ho to kahan mumkin hai
dusron ke liye khud aabla-pa ho jaana


khalq ki sang-zani meri khataon ka sila
tum to ma'sum ho tum dur zara ho jaana
ab mere waste tiryak hai ilhad ka zahr
tum kisi aur pujari ke khuda ho jaana