bhadki hui hai sham-e-shabistan-e-zindagi
shoala na chum le kahin daman-e-zindagi

marne ke baad phulon se turbat nawaz di
hota hai kaun zist mein pursan-e-zindagi

aish-o-khushi nashat-o-tarab rahat-o-sukun
hain in se badh ke kaun harifan-e-zindagi

bar-e-alam uthane ke qabil bana diya
kya kam hua hai mujh pe ye ehsan-e-zindagi

aaghaz-e-bab-e-nau hai meri maut ai 'amin'
tabdil kar raha hun main unwan-e-zindagi