bhatakta hun magar khoya nahin hun
banai rah pe chalta nahin hun

mujhe rangne ki koshish mat karo tum
main mazi ka koi panna nahin hun

mujhe hi log kho dete hain aksar
kisi ko main kabhi khota nahin hun

main shamil hun faqiron ki khushi mein
main sikka hun magar khota nahin hun

naha leta hun ja kar mai-kade mein
lahu se hath main dhota nahin hun

ghazal ke ganw mein sab hain munafiq
kisi ke ghar main ab jata nahin hun

bichha kar jism ki chadar wo bola
samajhte ho jo tum waisa nahin hun

meri qimat gira sakte nahin tum
main insan hun koi rupya nahin hun