bichhaD gaya hun mera karwan nahin milta

bichhad gaya hun mera karwan nahin milta
kahin kisi ke qadam ka nishan nahin milta
khala mein dal diya shauq-e-irtiqa ne mujhe
zamin bhi chhut gai aasman nahin milta


hazaron raaz chhupae hon apne sine mein
kise sunaun koi raazdan nahin milta
na jaane kaun chura le gaya khuda jaane
bahut dinon se dil-e-na-tawan nahin milta


tumhaare shahr mein rahne ke waste hum ko
lahad to milti hai lekin makan nahin milta
khada hai dhup mein ek ajnabi udas udas
haweliyan hain bahut saeban nahin milta


hamare daur ke qatil hain kitne shoabda-gar
ab aastin pe lahu ka nishan nahin milta
ajib haal hai hum shairan-e-urdu ka
zaban mili hai magar ham-zaban nahin milta


wahan pe umr guzari hai hum ne ai 'rizwan'
ki sans lene ka haq bhi jahan nahin milta