بن ترے دل کے نگر کو میں بساؤں کیسے

بن ترے دل کے نگر کو میں بساؤں کیسے
تجھ کو دلہن میں بناؤں تو بناؤں کیسے
زندگی مجھ کو مری قبر پہ لے آئی ہے
آنا چاہوں میں ترے پاس تو آؤں کیسے


بے وفائی کی صفت اس کی نہیں جاتی ہے
اپنے دل کا اسے ہمراز بناؤں کیسے
اے خدا تو نے مرے عیب چھپا رکھے ہیں
اے خدا میں ترا احسان چکاؤں کیسے


وہ تو پتھر ہے اسے کچھ نہ سمجھ آئے گی
داستاں اس کو سناؤں تو سناؤں کیسے
جب مرا رب ہی عطا کرتا ہے مجھ کو سب کچھ
غیر کے در پہ جبیں اپنی جھکاؤں کیسے


ساتھ رہتا نہیں منہاجؔ ہمیشہ وہ بھی
مجھ سے روٹھا ہے مرا عکس مناؤں کیسے