بوڑھے قصہ گو کی سانس اکھڑتی تھی

بوڑھے قصہ گو کی سانس اکھڑتی تھی
رات کی چھت پہ نیلی شبنم پڑتی تھی
دور کہیں تھے فیل سوار خلا زادے
رستے میں سورج کی بستی پڑتی تھی


باغ میں جادو گرنی اک خورشید لقا
پہروں اپنے حسن پہ خوب اکڑتی تھی
رات کڑکتی برق کی دہشت ناک انی
آنکھ کی پتلی میں جا جا کے گڑتی تھی


اک تاجر زادی سے دل کا سودا تھا
بنتے بنتے اک دم بات بگڑتی تھی
جنت کے حق داروں کو اس دنیا میں
روٹی بھی مشکل سے پوری پڑتی تھی


گوری کے صندوق میں امیدوں کے بیچ
سرخ مشجر کی پوشاک سکڑتی تھی
آنکھ کھلی تو جن تھا اور نہ انگوٹھی
قسمت اپنا خالی ہاتھ رگڑتی تھی