bujhe bujhe hue dagh-e-jigar ki baat na kar

bujhe bujhe hue dagh-e-jigar ki baat na kar
bhadak uthega ye shoala sahar ki baat na kar
bas ek bar mohabbat se dekhne wale
ye wo karam hai ki bar-e-digar ki baat na kar


taras na jaen kahin rang-o-bu ko ahl-e-chaman
gulon ko dekh ke zakhm-e-jigar ki baat na kar
mata-e-dard badha aur muskurae ja
shab-e-firaq numud-e-sahar ki baat na kar


naya nahin hai ye hangama ahl-e-dil ke liye
sukut-e-aina-e-khud-naigar ki baat na kar
kahan kahan se guzarna hai be-niyazana
nazar se dekh shuur-e-nazar ki baat na kar


ye phul hain mere 'nashtar' jigar ke dagh nahin
fareb-khurda-e-shabnam guhar ki baat na kar