buniyaad-e-jahan mein kaji kyun hai
har shai mein kisi ki kami kyun hai

kyun chehra-e-khar shagufta hai
aur shakh-e-gulab jhuki kyun hai

wo wasl ka din kyun chhota tha
ye hijr ki raat badi kyun hai

jis baat se dil mein halchal hai
wo baat labon pe ruki kyun hai

mat dekh ki kaun hai parwana
ye soch ki shama jali kyun hai

na the khwab to aansu hi hote
mera kasa-e-chashm tahi kyun hai