buq’a-e-nur har ek rahguzar ho jae

buq’a-e-nur har ek rahguzar ho jae
wo meri raat se guzre to sahar ho jae
husn-e-taban ki tajalli ka wo 'alam ho ki bas
ek jhalak dekh ke taskin-e-nazar ho jae


koi to jalwa-kunan ho mah-o-anjum ki tarah
dida-e-shauq ki jo rahguzar ho jae
‘ariz-e-husn pe raaton ka basera hai to kya
rukh se jhatka de jo zulfon ko sahar ho jae


hum ki musa nahin koi jo taqaza karte
husn khud chahe to mahfuz-e-nazar ho jae
hum wafa kar ke bhi badnam bahut hain yaro
wo jafa bhi jo karen hain to hunar ho jae


tum kureda na karo dil ki dabi rakhon ko
sho'la sho'la na kahin khak-e-sharar ho jae
samne us ke samundar ki haqiqat kya hai
ek qatra jo gunahgar-e-guhar ho jae


nau’-e-adam mein koi tukhm 'sahar' hai ki nahin
khak ke parde se nikle to bashar ho jae