chahe jugnu ki sitara ki guhar mein rahna
tum bahar-rang bahar-shakl nazar mein rahna

thak ke raste mein kahin baith na jaana rahi
chalte rahna ki muqaddar hai safar mein rahna

tere ek roz ke didar mein hai kitni kashish
roz ka kaam hua teri dagar mein rahna

khubsurat to bahut hai ye tera ganw magar
koi din aa ke hamare bhi nagar mein rahna

maut ke baad phir ek gardish-e-paiham ki khabar
tute patton ka hawaon ke bhanwar mein rahna

azhdaha bhid ka phir tum ko nigal jaega
dur hona to bas itna ki nazar mein rahna

ek dhadka sa laga rahta hai barish mein 'asir'
ghar mein rahte hue aasan nahin ghar mein rahna