chaliye kahin sahra hi mein ab khak udaen
basti mein to sab jal gain khwabon ki ridaen

bechain hai muztar hai pareshan hai ye ruh
kab tak ise ehsas ki suli pe chadhaen

aankhon mein padhi jati hai sail ki zarurat
chehre se suni jati hain khamosh sadaen

main waqt ki raftar ka rukh mod raha hun
wo log jo darte hain mere sath na aaen

munh mod rahe hain jo 'ziya' jahd-o-amal se
ja kar dar-e-taqdir ki zanjir hilaen