چراغ بن کے ہواؤں کی میزبانی کی

چراغ بن کے ہواؤں کی میزبانی کی
زمین ہم نے بہت تیری پاسبانی کی
چکانی پڑتی ہیں اور وہ بھی روز قسطوں میں
عجیب قیمتیں ہوتی ہیں مہربانی کی


تمہارے درد سے لے کر ہمارے آنسو تک
بڑی طویل کہانی ہے آگ پانی کی
تمام رشتوں میں اک گانٹھ پڑتی جاتی ہے
ہوائیں چلتی ہیں ذہنوں میں بد گمانی کی


فضا خراب ہے لیکن بہت خراب نہیں
بس اک ذرا سی ضرورت ہے ساودھانی کی
جو ڈور میں بھی نہیں تھیں انہی پتنگوں نے
ہوا ملی تو بہت بات آسمانی کی