chashm-e-ana se baada-e-gham pi raha tha wo

chashm-e-ana se baada-e-gham pi raha tha wo
kal raat apne aap mein duba hua tha wo
mujh ko mere wajud se bahar jo le gaya
mere hi rup mein koi bahrupiya tha wo


shor us ko zindagi ka sunai nahin diya
shayad kisi ki chah mein duba hua tha wo
mahshar mein mujh ko puchh raha tha har ek se
malum baad mein hua mera khuda tha wo


mujh sa hi shakhs koi mere aaine mein tha
mujh ko hi dekh dekh ke ghabra raha tha wo
'afroz' aaya samne yun us ke dil ka chor
taswir meri dekh ke sharma raha tha wo