chashm ko saunpi gai khidmat-e-khwab
dil pe tari hai ajab haalat-e-khwab

khwab ab ke na haqiqat ho jae
ab ke aisi hai meri shiddat-e-khwab

main ne padh li hain teri bhi aankhen
sirf mujh par na laga tohmat-e-khwab

tujh ko muzhda ho meri aankh ki ab
mujh mein baqi na rahi himmat-e-khwab

khwab makhfi hi rahe sab se yahan
kaun karta hai bhala izzat-e-khwab

meri aankhon mein guhar hain kitne
mujh ko hasil hai bahut daulat-e-khwab

tum ki jalwat se gurezan ho bahut
ab to aa jao ki hai khalwat-e-khwab

us ke pahre hain meri aankhon par
us ko malum hai kya quwwat-e-khwab

kitna be-khwab kiya hai tu ne
chhod pichha mera ai aafat-e-khwab

bas kaleja hi chaba jati hai
kitni khunkhar hai ye wahshat-e-khwab

kaenat aur hayat ai 'khalid'
khwab mein jaise koi saat-e-khwab