chupke chupke kaun ye dil par karam farmae hai

chupke chupke kaun ye dil par karam farmae hai
dard se taskin milti hai sukun tadpae hai
dushmanon se puchh kar dekho to az-rah-e-khulus
mere bare mein mere ahbab ki kya rae hai


jaane kis 'alam mein hain ehsas ki majburiyan
main bhulata hun jise aksar wahi yaad aae hai
ye mata'-e-be-badal sab ke muqaddar mein kahan
gham 'ata karne se pahle dil bhi dekha jae hai


chhed in taron ko lekin han zara aahista chhed
yaad-e-jaanan ab to dil ka saz tuta jae hai
mere dil ka haal koi puchhne wala nahin
aur mera dil ki ghairon ke bhi gham apnae hai


main ne dekha hai wo 'alam bhi nigah-e-shauq ka
jab teri taswir mein bhi jaan si pad jae hai
jo mere dil par guzarti hai kisi ko kya khabar
dekhne wala meri surat se dhoka khae hai


'badr' har 'alam mein hai 'alam wahi pesh-e-nazar
koi surat ho wahi surat nazar aa jae hai