ہوں مشت خاک مگر کوزہ گر کا میں بھی ہوں

ہوں مشت خاک مگر کوزہ گر کا میں بھی ہوں
سو منتظر اسی لمس ہنر کا میں بھی ہوں
کبھی ہوائے سر شاخسار ادھر بھی دیکھ
کہ برگ زرد ہوں لیکن شجر کا میں بھی ہوں


یہ تیز روشنیوں کا دیار ہے ورنہ
چراغ تو کسی تاریک گھر کا میں بھی ہوں
تمہارے زخموں سے میرا بھی ایک رشتہ ہے
لہو نہیں ہوں مگر چشم تر کا میں بھی ہوں


مجھے کھنچی ہوئی تلوار سونپنے والے
میں کیا کروں کہ طرفدار سر کا میں بھی ہوں
اب آ گئی ہے سحر اپنا گھر سنبھالنے کو
چلوں کہ جاگا ہوا رات بھر کا میں بھی ہوں