دم رخصت فراہم ہجر کا سامان کرتے ہیں

دم رخصت فراہم ہجر کا سامان کرتے ہیں
دل حیرت زدہ کو اور بھی حیران کرتے ہیں
اٹھائیں کس قدر احساں کرم فرمائیوں کا ہم
زمانے بھر میں کہتے ہیں کہ وہ احسان کرتے ہیں


نظر انداز کرنے کا گلہ ان سے نہیں لیکن
ہمیں بھی دیکھنا ہے وہ کسے مہمان کرتے ہیں
ڈراتے کیا ہو نادانو انہیں اونچی عمارت سے
چٹانوں کا جو سینہ چیر کر میدان کرتے ہیں


وفا کی جستجو میں ہم کسی ویران رستے پر
متاع زندگی کا کس قدر نقصان کرتے ہیں
درون ذات کی پیچیدگی کچھ کم نہیں احمرؔ
زمانے کے لیے ہم شاعری آسان کرتے ہیں