dekh pai na mere sae mein chalta saya
aa gai raat uthane mera dhalta saya

tum ne achchha hi kiya chhod gae waise bhi
ek sae se bhala kaise sambhalta saya

main wahi hun mera saya bhi wahi hai ab tak
main badalta to koi rang badalta saya

main ne is waste munh kar liya suraj ki taraf
mujh se dekha na gaya aage nikalta saya

aaj bhi baitha hun gum-sum pas-e-diwar-e-ana
mujh se lipta hai teri yaad ka jalta saya

tujh pe guzri hi nahin wahshat-e-sham-e-hijran
tu ne dekha hi nahin ped nigalta saya