dekho firaq-e-yar mein jaan kho raha hai wo
'shahzad' ko sambhaalo bahut ro raha hai wo

aae nae jo zakhm to ye ruh ne kaha
kuchh der baith jao abhi so raha hai wo

sahra ki khak haq mein mere kah rahi hai ye
jo hona chahta tha wahi ho raha hai wo

pahle bhi khali hath tha hai ab bhi khali hath
aur kab se bar-e-sud-o-ziyan dho raha hai wo

ai aasman tu shukr ada us ka kijiyo
be-dil zamin ke sine mein dil ho raha hai wo

dekho kahan kise mile 'shahzad' dahr mein
hum ne suna hai khud ko kahin kho raha hai wo