der nahin haram nahin dar nahin aastan nahin
main ne wufur-e-shauq mein sajda kiya kahan nahin

mana ki musht-e-khak hun phir bhi mujhe ye fakhr hai
meri nigah se pare wusat-e-do-jahan nahin

khun-e-dil-e-gharib se sinch sake na jo chaman
nang-e-chaman hai wo bashar hasil-e-gulistan nahin

bar-e-shab-e-firaq se shisha-e-dil hai chur-chur
phir bhi hain muskurahaten lab pe mere fughan nahin

tere gham-e-firaq mein mere labon pe aaj-kal
naghma-e-zindagi nahin baada-e-arghawan nahin

fasl-e-bahaar ke liye main ne bhi khun-e-dil diya
daur-e-bahaar mein magar mera kahin nishan nahin