دیر سے اپنے اپنے گھیرے میں

دیر سے اپنے اپنے گھیرے میں
لوگ بیٹھے ہوے ہیں رستے میں
ایک گاہک تھا وہ بھی چھوڑ گیا
اب رکھیں گے دکان اکیلے میں


میں نے پنجرہ تو توڑ ڈالا مگر
فاختہ آ گئی لپیٹے میں
بین بجتے ہی ایک اور ناگن
ناچنے لگتی ہے سپیرے میں


اس کے قدموں میں ڈال پہلا پھول
جس نے مٹی بھری تھی گملے میں
گھر میں اک آئنہ بھی ہوتا تھا
بس وہی ڈھونڈتا ہوں ملبے میں


بچے بچے کو کر رہا ہوں سلام
اس کے کوچے کے پہلے پھیرے میں
ایک مچھلی جو ریت پر تڑپی
جان سی پڑ گئی مچھیرے میں