dhul mitti gard ne suni faza aabaad ki
khak par kunji dhari thi khana-e-barbaad ki

sar-nigun mehrab ye tuti munderen baam-o-dar
taq mein phaili hui sargoshiyan ajdad ki

main nahin pahuncha to tere naqsh-e-pa ne der tak
rah ke patthar se sukhi ghas se fariyaad ki

dhundhta phirta hai aksar yaad ki galiyon mein dil
unghti jamuna kinare sham allahabad ki

zakhm risne lag gaya jab khun aaluda kadi
qaidiyon ne halqa-e-zanjir se aazad ki