dikha raha hai angutha falak se tara mujhe
dhakel de na bulandi se phir dobara mujhe

mere siwa bhi koi qaid hai kharabe mein
ajib taur se wo raat-bhar pukara mujhe

mere khilaf khada ho gaya hai kaun aakhir
jo rup dhaar ke mera hi tir mara mujhe

kiya jab us ne tah-e-ab meri kashti ko
samajh mein baat nahin aai kyon ubhaara mujhe

abhi samet raha hun main dhajjiyan apni
na jao chhod ke aise mein be-sahaara mujhe