dil agar daghdar ho jata

dil agar daghdar ho jata
ek sarapa bahaar ho jata
daman-e-sabr hijr ke hathon
kyun na yun tar-tar ho jata


wae majburiyan mohabbat ki
zabt par ikhtiyar ho jata
main ne yun shikwa-e-jafa na kiya
wo agar sharmsar ho jata


pas hota agar wo jaan-e-bahaar
be-niyaz-e-bahaar ho jata
ek nigah-e-karam jo ho jati
phir to beda hi par ho jata


un ki tirchhi nazar ka kya kahna
jis pe padti shikar ho jata
un nigahon ki mastiyan tauba
mai-kada sharmsar ho jata


pyar karte hain wo jinhen 'shankar'
kash un mein shumar ho jata